ତାଙ୍କ ପାଖରେ ଥିବା ହୃଷୀକେଶ ତାଙ୍କୁ ସାହାରା ଦେଇ କହିଲେ,ଦେଖିଚାହିଁ ଚାଲୁନ ?ଆଉ ଟିକକରେ ମୁଣ୍ଡ ଫାଟି ଦୁଇଫାଳ ହୋଇ ଯାଇଥାଆନ୍ତା !ଏତେ ଜୋରରେ ଆଘାତ ଲାଗିଥିବା ଯୋଗୁଁ ତାଙ୍କ ମୁଣ୍ଡ ଫାଟି ଯାଇଥିବ ବୋଲି ନିର୍ମଳା ଭାବିଥିଲେ |କିନ୍ତୁ ସୌଭାଗ୍ୟକ୍ରମେ ସେମିତି କିଛି ଅଶୁଭ ଘଟଣା ଘଟି ନଥିଲା |କଣ ହେଲା କହି, ସୁଲୋଚନା କ୍ଷିପ୍ର ଗତିରେ ତାଙ୍କ ପାଖକୁ ଆସି ତଳୁ ଚଷମା ଉଠେଇ ତାଙ୍କ ହାତରେ ଦେଲେ ଓ ତାଙ୍କୁ ଆଉଁସି ପକାଇ କହିଲେ,ଅପା,ଠିକ ଠାକ ଅଛନ୍ତି ତ ?ତାଙ୍କ ପରେ ପରେ ସେଠାକୁ ଅଙ୍କିତ,ଲିପି ,ନନ୍ଦିନୀ, ସମର ଓ ସୁଧାକର ଆସି ତାଙ୍କୁ ଘେରିଗଲେ |
ସେମାନଙ୍କୁ ଦେଖି,ନିର୍ମଳା ଅଳ୍ପ ହସି କହିଲେ, କିଛି ହୋଇନି,ମୁଁ ଠିକ ଅଛି,ଚାଲ ଯିବା |ଏସବୁ ଘଟଣା ଲକ୍ଷ୍ୟ କରୁଥିବା ଜଣେ ବୟସ୍କ ପୂଜାରୀ ନନା ନିର୍ମଳାଙ୍କୁ କହିଲେ,ଏହି ଠାକୁର ଭାରି ପ୍ରତ୍ୟକ୍ଷ ମା' |ଦୁର୍ଘଟଣା ମାଧ୍ୟମରେ ସେ ଆପଣଙ୍କୁ କିଛି ସନ୍ଦେଶ ଦେଇଛନ୍ତି |ନିର୍ମଳା ତାଙ୍କୁ ପ୍ରଶ୍ନବାଚକ ଦୃଷ୍ଟିରେ ଚାହିଁବାରୁ ସେ କହିଲେ,ଆଗକୁ ଆପଣଙ୍କର ବହୁତ ବଡ଼ ବିପଦ ଆସିବାର ଅଛି |ତାଙ୍କ କଥା ଶୁଣି ଭୟରେ ନିର୍ମଳାଙ୍କ ଗୋଡ଼ହାତ ଥରିବାକୁ ଲାଗିଲା |ନନା ହସି ଦେଇ କହିଲେ,ବ୍ୟସ୍ତ ହେବାର ନାହିଁ ,ବିପଦ ପଥର ପରି ଆସି ପତର ପରି ଉଡିଯିବ |ଆପଣମାନଙ୍କୁ ଖାଲି ଟିକେ ସତର୍କ ରହିବାକୁ ପଡିବ |ନିର୍ମଳା ସେହିକ୍ଷଣି ନନାଙ୍କୁ ମୁଣ୍ଡିଆ ମାରି ତାଙ୍କ ପାଦଧୂଳୀ ନେଇ କହିଲେ,ଆପଣଙ୍କ ଆଶୀର୍ବାଦରେ ଆମର ସବୁ ବାଧାବିଘ୍ନ ଦୂର ହୋଇଯିବ,ସବୁ ଅଶୁଭ ଶୁଭ ହୋଇଯିବ |
ପରେ ପରେ ନିର୍ବନ୍ଧ କାମ ଆରମ୍ଭ ହୋଇ ବିନା ବାଧାବିଘ୍ନରେ ଶେଷ ହେଲା |ନନାଙ୍କ ନିର୍ଦ୍ଦେଶରେ ସମସ୍ତେ ଠାକୁରଙ୍କୁ ମୁଣ୍ଡିଆ ମାରିଲେ | ନିର୍ମଳା ଠାକୁରଙ୍କୁ ସାଷ୍ଟାଙ୍ଗ ପ୍ରଣିପାତ ଜଣାଇ କହିଲେ,ପ୍ରଭୁ ଆମ ଦୁଇ ପରିବାରଙ୍କୁ ଘଣ୍ଟ ଘୋଡାଇ ରଖ ,ତୁମ ଚରଣରେ ଏତିକି ମିନତୀ | ସେ ତାପରେ ଅଙ୍କିତକୁ କହିଲେ,ତମେ ଦୁଇଜଣ ନନାଙ୍କୁ, ସବୁ ଗୁରୁଜନଙ୍କୁ ଓ ମନ୍ଦିରର ସବୁ ଦେବାଦେବୀଙ୍କୁ ପ୍ରଣାମ କରି ଆସ,ଆମେ ଏଇଠି ଅଛୁ | ଅଙ୍କିତ ସମ୍ମତ୍ତି ଜଣାଇବାବେଳେ ତା ମୁଖମଣ୍ଡଳର ପ୍ରଫୁଲ୍ଲତା ଓ ଉଜ୍ଜଳତାକୁ ଦେଖି ନିର୍ମଳାଙ୍କ ମନ ପ୍ରସନ୍ନତାରେ ଭରିଗଲା | ଲିପି ଓ ଅଙ୍କିତ ଯେତେବେଳେ ନନାଙ୍କୁ ଓ ସମସ୍ତ ଗୁରୁଜନଙ୍କୁ ମୁଣ୍ଡିଆ ମାରି ସମସ୍ତ ଦେବାଦେବୀଙ୍କୁ ଭକ୍ତି ସହକାରେ ମୁଣ୍ଡିଆ ମାରୁଥିଲେ,ନିର୍ମଳା ଏକ ଲୟରେ ସେମାନଙ୍କୁ ଚାହିଁ ରହିଥିଲେ |ମନେ ମନେ ଈଶ୍ୱରଙ୍କୁ ଗୁହାରି କରି କହୁଥିଲେ,ମୋ ପିଲାମାନେ ତମକୁ ଲାଗିଲେ,ପ୍ରଭୁ,ତମେ ହିଁ ଏକା ସାହା ଭରସା !!!
ଏହାପରେ ସମସ୍ତେ ଏକାସାଙ୍ଗରେ ବସି,ମନ୍ଦିରରେ ପ୍ରସାଦ ସେବନ କଲେ |ହୃଷୀକେଶ ସୁଧାକରଙ୍କୁ କହିଲେ,ଆଜି ତ ଆମର କାହାରି ଭୁବନେଶ୍ୱର ଫେରିବାର ନାହିଁ |ଏବେ ସମସ୍ତେ ନନ୍ଦିନୀ ଘରକୁ ଯିବା |ସେଇଠି ବାହାଘର ବିଷୟରେ ଆଲୋଚନା କରିବା |ତାପରେ ସମସ୍ତେ ଏକାଠି ଡିନର ଖାଇବା |କାଲି ସକାଳେ ବ୍ରେକଫାଷ୍ଟ ଖାଇ ଆମେ ସମସ୍ତେ ଏକା ସାଙ୍ଗରେ ବାହାରି ଯିବା,ନାଁ କଣ କହୁଛନ୍ତି ? ସୁଧାକର କହିଲେ,ଆପଣ ଠିକ କହୁଛନ୍ତି,କିନ୍ତୁ ଡିନର କାର୍ଯ୍ୟକ୍ରମ ଏଥିରୁ ବାଦ ଦେଲେ ଚଳନ୍ତା ନାହିଁ ?ସମସ୍ତେ କ୍ଲାନ୍ତ ହୋଇଛନ୍ତି,ଅଯଥା ଆପଣମାନଙ୍କୁ ହଇରାଣ କରିବା କଥା !ହୃଷୀକେଶ କହିଲେ,ସେମିତି କେମିତି ହେବ ?ଆପଣମାନଙ୍କୁ ନ ଖୁଆଇ ଆମେ କଣ ଛାଡି ପାରିବୁ ?ଆମର ଆଲୋଚନା ସରୁ ସରୁ ରୋଷେଇ ସରି ଯାଇଥିବ,ତାପରେ ଆପଣମାନେ ଖାଇଦେଇ ଘରକୁ ଯାଇ ଖାଲି ଶୋଇବା କଥା |ଏ ସୁଯୋଗ କଣ ବାରବାର ଆସିବ ?ତାଙ୍କ କଥା ଶୁଣି ସୁଧାକର ଖୁସି ହୋଇ କହିଲେ,ହଉ ଠିକ ଅଛି,ଯାହା ଆପଣଙ୍କ ଇଚ୍ଛା |(କ୍ରମଶଃ)
No comments:
Post a Comment