ତା ପରଦିନ ସକାଳେ ନିର୍ମଳାଙ୍କର ନିଦ ଭାଙ୍ଗିଲା ବେଳକୁ ଛଅଟା ବାଜି ଗଲାଣି |ଏତେ ସମୟ ଯାଏଁ ସେ କେବେ ବି ଶୁଅନ୍ତି ନାହିଁ |ତର ତର ହୋଇ ଉଠି ଦେଖିଲେ,ଅଙ୍କିତ ଉଠି ଟି.ଭି.ଦେଖୁଛି |ସକାଳେ ଏତେ ଶୀଘ୍ର ସେ କେବେହେଲେ ଉଠେନାହିଁ |ରାତିରେ ଶୋଇଥିଲା କି ନାହିଁ,ଭଗବାନଙ୍କୁ ଜଣା |ତାଙ୍କୁ ଉଠିବାର ଦେଖି ଅଙ୍କିତ କହିଲା,ମାମା ,ଆମ ରୁମଟା ଭାରି ଗନ୍ଧ ହେଉଛି,ଟିକେ ଝଡାଝଡି କରି ସଫା କରିଦେବ ତ!ସେ ବାସନ୍ତୀ (କାମବାଲୀ)ଜମା ସଫା କରୁନି |ନିର୍ମଳା କହି ଆସୁଥିଲେ,ବାସନ୍ତୀ ଆସିଲା ବେଳକୁ ତ ମାଡାମଙ୍କ ପହଡ଼ ଭାଙ୍ଗି ନଥିବ,କବାଟ ଖୋଲା ହେଲେ ସିନା ବାସନ୍ତୀ ସଫା କରିବ !କିନ୍ତୁ ଏସବୁ କିଛି କହି ନପାରି ସେ କହିଲେ,ହଉ ମୁଁ ଦେଖୁଛି |
ବାହାଘର ପରଠାରୁ ନିର୍ମଳା ପୁଅବୋହୂଙ୍କ କୋଠରୀକୁ ଯାଇ ନଥିଲେ |ଏତେଦିନ ପରେ ପ୍ରଥମଥର ପାଇଁ ସେ ସେମାନଙ୍କ ରୁମରେ ପ୍ରବେଶ କରୁଥିଲେ | ସେ ସେଠାକୁ ଯାଇ ଦେଖିଲେ,ଘର ସାରା ଅଳିଆ ଓ ଅଳନ୍ଧୁ ଭର୍ତ୍ତି |ସୌମ୍ୟାର ଆଲମିରା ଅଧା ଖୋଲା ହୋଇ ରହିଛି,ସେଥିରୁ ତାର କିଛି ଶାଢ଼ୀ ଓ ଡ୍ରେସ ପଦାକୁ ବାହାରି ଆସିଛି |ଆଲଣା ଉପରେ ତାର ଲୁଗାପଟା ଛିନଛତ୍ର ହୋଇ ପଡିଛି |ତା ଉପରେ ମଧ୍ୟ ଆଙ୍ଗୁଠେ ବହଳ ମଳି |ଏକପ୍ରକାର ପଚା ଦୁର୍ଗନ୍ଧରେ ଘର ଫାଟି ପଡୁଛି |ଯେଉଁ ଦିଗରୁ ପଚା ଦୁର୍ଗନ୍ଧ ଆସୁଥିଲା,ଗନ୍ଧ ଶୁଙ୍ଘି ଶୁଙ୍ଘି ସେଠାକୁ ଯାଇ ଦେଖିଲେ ଏକ ପଲିଥିନ ବ୍ୟାଗରେ ରେ ତାର ବୋଝେ ମାସିକ ପିରିଅଡ ନାପକିନ କେଜାଣି କେବେଠାରୁ ରହିଛି !!ସେ ନାକ ବନ୍ଦ କରି ପ୍ରଥମେ ସେହି ପଲିଥିନକୁ ନେଇ ଘର ବାହାରେ ଥିବା ଡଷ୍ଟବିନରେ ପକାଇ ଦେଇ ହାତ ସାବୁନରେ ଧୋଇ ଆସିଲେ |ସେ ରୁମରେ ଯେତେ ମଳିଆ କପଡା,ବେଡ଼ସିଟ,ତକିଆଖୋଳ ଆଦି ଥିଲା,ସେ ସବୁକୁ ସେ ୱାଶିଙ୍ଗ ମେସିନରେ ପକେଇଲେ |ସେତେବେଳକୁ ବାସନ୍ତୀ ଆସିଲା |ତାକୁ ସେ କହିଲେ,ତୁ ପ୍ରଥମେ ଏ ଘର ସଫା କରି ପୋଛ,ତାପରେ ଆଉ ଯୋଉ କାମରେ ହାତ ଦେବୁ |ବାସନ୍ତୀ କହିଲା,ମ,ବୋହୂ ସାଇବାଣୀ ତ ମୁଁ ସବୁଦିନ ଆସିଲା ବେଳକୁ ଶୋଇଥିବେ,ସେ ଉଠିଲେ ସିନା ମୁଁ ଘର ସଫା କରିବି ?ନିର୍ମଳା ବିରକ୍ତ ହୋଇ କହିଲେ,ମୁଁ ତତେ କିଛି ପଚାରିଲି ?ଅଯଥା କଥା ନକରି,ମୁଁ ଯାହା କହିଲି,ତାହା କର |
ବାସନ୍ତୀ ତା କାମ ସାରି ଯିବାବେଳେ ନିର୍ମଳା ତାକୁ କହିଲେ,ତୁ କାଲିଠାରୁ ସମସ୍ତଙ୍କ ଘରେ କାମସାରି ଆମ ଘରକୁ ଆସିବୁ |ବାସନ୍ତୀ କହିଲା,ଏଗାରଟା ଉପରେ ହୋଇଯିବ ମା' |ନିର୍ମଳା କହିଲେ,ହଉ ପଛକେ |ଆଉ ଶୁଣ,ପ୍ରତ୍ୟେକ ଦିନ ପୁଅବୋହୂଙ୍କ ରୁମରେ ଲୁଗାପଟା ସଜାଡି ଆଲଣାରେ ରଖିବୁ,ବେଡ଼ ସିଟ ଝାଡ଼ି ଭଲରେ ପକେଇବୁ,ତାପରେ ଘର ଝାଡୁ କରି, ପୋଛା ଲଗେଇବୁ |ବାସନ୍ତୀ ପଚାରିଲା,ମା' ସବୁଦିନ ?ନିର୍ମଳା ଉତ୍ତର ଦେଲେ,ହଁ,ସବୁଦିନ |ବାସନ୍ତୀ ଗମ୍ଭୀର ହୋଇ କହିଲା,ତାହେଲେ ପାଉଣା ଅଧିକା ପଡିବ ମା' |ନିର୍ମଳା କହିଲେ,ହଉ,ଆଉ ଶହେ ଟଙ୍କା ଅଧିକା ଦେବି ,କେତେ ଫୁଲେଇ ହଉଛୁ !ବାସନ୍ତୀ କହିଲା,ନାଁ ମା' |ଭଲକାମ କରିବି ମାନେ ଭଲ ପଇସା ନେବି |ପାଁଶହରୁ କମ ହବନି |ଆଉ ନିର୍ମଳାଙ୍କ ଉତ୍ତରକୁ ଅପେକ୍ଷା ନକରି ସେ ସେଠାରୁ ଚାଲିଗଲା |(କ୍ରମଶଃ)
No comments:
Post a Comment