ଲିପି ମୋବାଇଲ ବନ୍ଦକରି ସୁଇଚ ଅଫ କରିଦେଲା |ଭାବପ୍ରବଣ ହୋଇ ଅନେକ ସମୟ ନିଶ୍ଚଳ ହୋଇ ବସିବା ପରେ ସେ ବିଛଣାରୁ ଉଠି ପାଣି ପିଇଲା ଓ ପୁଣି ଶୋଇପଡି ନିଜ ବିଷୟରେ ଚିନ୍ତା କରିବାକୁ ଲାଗିଲା |ସେ ବାପା ବୋଉଙ୍କର ବଡ଼ଝିଅ |ବାପା ସବୁବେଳେ ଗର୍ବ କରି ସମସ୍ତଙ୍କୁ କହନ୍ତି ,ସେ ମୋର ଝିଅ ନୁହେଁ,ମୋ ପୁଅ |ଜର୍ଣ୍ଣାଲିଜମ ପଢିବା ପାଇଁ,ମଝିଆ ଭଉଣୀ ପ୍ରଜ୍ଞାର କେବେଠାରୁ ଇଛା ଅଛି |ସାନଭଉଣୀ ପ୍ରାଚୀ ସମସ୍ତଙ୍କର ଗେହ୍ଲା |ଇଞ୍ଜିନିଅର ହେବାପାଇଁ ତାର ଲକ୍ଷ୍ୟ ରହିଛି |ବାପା ସ୍ୱଳ୍ପ ବେତନଭୋଗୀ କର୍ମଚାରୀ |ଗାଆଁରୁ କିଛି ଆସେ ନାହିଁ,ସବୁ କିଣା ହୁଏ |ସେ ଚାକିରୀ କରିବା ପୂର୍ବରୁ ସେମାନେ ଧାର କରଜରେ ବୁଡି ଯାଇଥିଲେ |ଶିକ୍ଷୟତ୍ରୀ ଚାକିରୀ ମିଳିବା ଖବର ପାଇ ବାପା କିପରି ଖୁସିରେ ଅଭିଭୂତ ହୋଇ ଯାଇଥିଲେ,ସେଦିନ କଥା ତାର ଏବେ ବି ସ୍ପଷ୍ଟ ମନେଅଛି | ଚାକିରୀ କରିବା ପରେ,ଧୀରେ ଧୀରେ ତାଙ୍କର ଆର୍ଥିକ ଅବସ୍ଥାରେ ସୁଧାର ଆସିଲା |ସମସ୍ତଙ୍କ ସ୍ୱପ୍ନ ପୂରଣ ହେବାର କେନ୍ଦ୍ରବିନ୍ଦୁ ସେ ପାଲଟି ଯାଇଥିଲା |ହୁଏତ ଅଙ୍କିତ ସହିତ ପ୍ରେମ ତା ପାଇଁ ଏକ ଅଭିଶାପ ଥିଲା | ପ୍ରକୃତରେ ଅଙ୍କିତର ମାମା ଠିକ କହୁଥିଲେ |ଅଙ୍କିତକୁ ବାହା ହୋଇଥିଲେ,ତାର ଦୁଇ ଭଉଣୀଙ୍କ ସ୍ୱପ୍ନ ଅଧୁରା ରହିଯାଇ ଥାଆନ୍ତା |କିମ୍ବା ସେମାନଙ୍କ ସ୍ୱପ୍ନ ପୂରଣ କରିବାକୁ ଯାଇ,ସେ ଅଯଥା ଅଙ୍କିତ ଉପରେ ବୋଝ ହୋଇଯାଇଥାଆନ୍ତା, ଯେଉଁଥିପାଇଁ ତାଙ୍କ ପରିବାରରେ ଅଶାନ୍ତିର ଝଡ଼ ସୃଷ୍ଟି ହେବାର ସମ୍ଭାବନା ବି ଥାଆନ୍ତା |ମାଉସୀ ଭାବିଚିନ୍ତି ଯେଉଁ ନିଷ୍ପତ୍ତି ନେଲେ,ତାହା ବୋଧହୁଏ ଉଭୟ ପରିବାର ପାଇଁ ସଠିକ ପଦକ୍ଷେପ ଥିଲା |ଏବେ ସେ ନିଶ୍ଚିନ୍ତରେ ଶତ ପ୍ରତିଶତ ନିଜ ପରିବାର ଉପରେ ଧ୍ୟାନ ଦେଇ ପାରିବ |ମନେ ମନେ ସେ ନିର୍ମଳାଙ୍କ ଉଦ୍ଦେଶ୍ୟରେ ହାତଯୋଡ଼ି କହିଲା,ମାଉସୀ, ମୋ ଅଜାଣତରେ ସ୍ୱାର୍ଥପର ହୋଇ କିଛିଦିନ ପାଇଁ,ମୁଁ ମୋ କର୍ତ୍ତବ୍ୟକୁ ଭୁଲି ଯାଇଥିଲି |ଆପଣଙ୍କ ପାଇଁ ମୁଁ ମୋ ଭୁଲି ଯାଇଥିବା କର୍ତ୍ତବ୍ୟକୁ ପୁଣି ମନେ ପକାଇ ପାରିଛି |ସେଥିପାଇଁ ଆପଣଙ୍କୁ କୋଟି କୋଟି ଧନ୍ୟବାଦ ଓ କୋଟି କୋଟି ଜୁହାର ମାଉସୀ |ଆପଣଙ୍କର ଏହି ଉପକାର ମୁଁ ଜୀବନସାରା ଭୁଲି ପାରିବି ନାହିଁ |
ସେ ନିଜ ବେଡ଼ ପାଖରେ ଥିବା ସୁଇଚ ଟିପି ଲାଇଟ ଅଫ କଲା |ନିଦ୍ରା ପରିବର୍ତ୍ତେ କ୍ରମେ ଅନେକ ଭାବନା ତାର ମନ ରାଜ୍ୟକୁ ଅକ୍ତିଆର କରିନେଲେ |ସେ ଭାବୁଥିଲା,ଲିପି ପରି ଝିଅମାନେ କେବଳ ସ୍ୱପ୍ନ ଦେଖନ୍ତି,ସ୍ୱପ୍ନକୁ ସାକାର କରିବା ଅଧିକାର ବୋଧହୁଏ ତାଙ୍କର ନଥାଏ | ପରିବାରର ଆଉ ଚାରିଜଣଙ୍କ ମୁହଁରେ ହସ ଫୁଟାଇବା ପାଇଁ,ସେମାନଙ୍କୁ ଅନେକ ତ୍ୟାଗ କରିବାକୁ ପଡେ |ଏହାକୁ ଅନ୍ୟ ଅର୍ଥରେ କହିବାକୁ ଗଲେ,ପରମସୌଭାଗ୍ୟ ନୁହେଁ ତ ଆଉ କଣ କୁହାଯାଇ ପାରିବ ?
ସେ ଘଣ୍ଟାକୁ ଚାହିଁ ଦେଖିଲା,ରାତି ଗୋଟାଏ ଉପରେ ହେଲାଣି |ମନେ ମନେ ଈଶ୍ୱରଙ୍କୁ ସ୍ମରଣ କରି ସେ ଶୋଇବାକୁ ଚେଷ୍ଟା କଲା |କିନ୍ତୁ ନିଦ୍ରାଦେବୀ ବୋଧହୁଏ ତା ଉପରେ ପ୍ରସନ୍ନ ନଥିଲେ |ବିଛଣାରେ ଏପଟ ସେପଟ ହୋଇ କେତେବେଳେ ରାତି ପାହିଗଲା ସେ ଜାଣି ପାରିଲା ନାହିଁ |(କ୍ରମଶଃ)
No comments:
Post a Comment