ସେମାନେ ଯେ ସୌମ୍ୟା ବିଷୟରେ ଆଲୋଚନା କରୁଛନ୍ତି,ଏହା ନନ୍ଦିନୀର ବୁଝିବାକୁ ବାକି ରହିଲାନି |ସେମାନେ ତା ବିଷୟରେ ଅଧିକା କଣ କହିବେ,ଏହା ଶୁଣିବାକୁ ସେ ସେଠାରେ ଅପେକ୍ଷା କଲା |କିନ୍ତୁ କେହି ଜଣେ ଠାରି ଦେବାରୁ ଆଲୋଚନା ସେହିଠାରେ ବନ୍ଦ ହୋଇଗଲା ଓ ସମସ୍ତେ ହାତ ଧରାଧରି ହୋଇ ଖାଇବାକୁ ଚାଲିଗଲେ |ନନ୍ଦିନୀର ମନ ଖରାପ ହୋଇଗଲା | ସେ ସେମାନଙ୍କ କଥା ବାରମ୍ବାର ଚିନ୍ତା କରିବାକୁ ଲାଗିଲା ଓ କେମିତି ଅତି ଶୀଘ୍ର ସେକଥା ନିର୍ମଳାଙ୍କ କାନରେ ପକାଇବ,ସେଥିପାଇଁ ବ୍ୟସ୍ତ ହେଲା |
ଅପରାହ୍ନରେ ସମସ୍ତେ ଘରକୁ ଫେରି ଆସିବା ପରେ,ନନ୍ଦିନୀ ନିର୍ମଳାଙ୍କୁ କହିଲା,ଅପା,ତୁ ଫ୍ରି ହେଲେ ମତେ କହିବୁ,ତତେ ଗୋଟିଏ କଥା କହିବାର ଅଛି |ନିର୍ମଳା ଜାଣିଥିଲେ, ସେ ଦେଇଥିବା ନିର୍ବନ୍ଧ ଶାଢ଼ୀ ନନ୍ଦିନୀର ପସନ୍ଦ ହୋଇନି |ସେ ହସିଦେଇ କହିଲେ,କଣ ତୋର ଶାଢ଼ୀ କଥା କହିବୁ ତ ?ନନ୍ଦିନୀ ବିରକ୍ତ ହୋଇ କହିଲା,ଓହୋଃ ଅପା,ତୋର ସବୁବେଳେ ଶାଢ଼ୀ,ଟଙ୍କା,ସୁନା ଉପରେ ଲକ୍ଷ୍ୟ |ମୁଁ ଅଲଗା କଥା କହିବି,ଶୁଣିଲେ ତୋ ମୁଣ୍ଡ ଚକ୍କର ଖାଇଯିବ |ନିର୍ମଳା ତା କଥା ଶୁଣି ଆଖି ବଡ଼ ବଡ଼ କରି କହିଲେ,ଆଚ୍ଛା ,ଏମିତି କଥା ?ଠିକ ଅଛି,ସନ୍ଧ୍ୟାଧୂପ ଦେଇସାରିବା ପରେ ମତେ କହିବୁ |
କିନ୍ତୁ ସେପର୍ଯ୍ୟନ୍ତ ନିଜ ମନରେ ଫୁଟୁଥିବା କଥାକୁ ରୋକିବା ନନ୍ଦିନୀ ପକ୍ଷରେ କଷ୍ଟକର ଥିଲା | ସନ୍ଧ୍ୟାଧୂପ ଦେବାପରେ ନିର୍ମଳା କହିଲେ,ଆ ,ଛାତ ଉପରକୁ ଯିବା ,ସେଇଠି ଯାହା କହିବାର କଥା କହିବୁ |ଛାତ ଉପରକୁ ଯାଇ ନନ୍ଦିନୀ ସେ ଶୁଣିଥିବା କଥା ପ୍ରକାଶ କରି କହିଲା,ଏମିତି ନବୁଝି ନଶୁଝି ତୁ କେମିତି ନିର୍ବନ୍ଧ କରି ପକେଇଲୁ ?ଏବେ ବି ସମୟ ଅଛି,ତୁ କଥାର ସତ୍ୟାସତ୍ୟ ଅନୁସନ୍ଧାନ କର ଓ ଦରକାର ପଡିଲେ ବାହାଘର ଭାଙ୍ଗି ଦେ |ପୁଅର ଜୀବନସଉଦା କଥା,ଇଏ କଣ ପିଲାଖେଳ ହୋଇଛି ନାଁ କଣ ?
ନିର୍ମଳା କହିଲେ,କିଛି ଭୁଲଭାଲ ନାହିଁ,ସବୁ ଠିକ ଅଛି |ଖାଲି ହିଂସାରେ ସେମାନେ ସେମିତି ବାଉଳି ହେଉଛନ୍ତି | ତାଙ୍କ ଘର ଲୋକ କଣ,ଆମଘର ଲୋକ କୋଉ କମ କି ?ସେ ଝିଅ ନାଆଁରେ କମ ବେନାମୀ ଚିଠି ଆସିଲାଣି ?ଆମେ ତାକୁ ପଢି ଏମିତି ଚିରି ଦେଉଛୁ,ନିର୍ମଳା ହାତ ଦେଖାଇ କହିଲେ |ନନ୍ଦିନୀ କହିଲା,ଏମିତି କଣ ଦେଖିଲ ଯେ, ତମେ ତା ବିଷୟରେ ଦୃଢ଼ନିଶ୍ଚିତ ହୋଇଗଲ ?
ନିର୍ମଳା କହିଲେ,ୟାଙ୍କର ଅଫିସରେ ବହୁତ ଶତ୍ରୁ,ତାଙ୍କର ପ୍ରମୋଶନ କରେଇ ଦେଉ ନଥିଲେ |ଶେଷରେ ବହୁତ କଷ୍ଟରେ ଫାଇଲ ଯେତେବେଳେ ଡି.ପି.ସି.ଦିନ ଧାର୍ଯ୍ୟ କରିବାପାଇଁ ଗଭର୍ଣ୍ଣମେଣ୍ଟକୁ ଗଲା,ତାକୁ ଫନ୍ଦିଫିକର କରି କେଉଁଠି ଲୁଚେଇ ଦେଲେ ଯେ,ତାର ପତ୍ତା ମିଳିଲାନି |ସମୁଦୀ କିନ୍ତୁ ଆମର କରିତକର୍ମା |ତାଙ୍କ ଝିଅ ସାଙ୍ଗେ ପ୍ରସ୍ତାବ ପଡୁ ପଡୁ ସେ ଏମିତି ଚକ୍ର ବୁଲେଇଲେ ଯେ,ଡିପିସି ଡେଟ ଫିକ୍ସ ହେଲା,ଆଉ ଇଏ ପ୍ରମୋଶନ ପାଇଲେ |ଖାଲି ସେତିକି ନୁହେଁ,ୟାଙ୍କୁ ଡେପୁଟେସନରେ ଗୋଟିଏ ଭଲ ପୋଷ୍ଟକୁ ପଠେଇବା ଚେଷ୍ଟାରେ ସେ ଲାଗିଛନ୍ତି |ମୁଁ ଡିଟେଲସ ଏବେ କହିବିନି,ହେଲେ,ତୁ ବଳେ ଜାଣିବୁନି କି? ଏତିକିବେଳେ ତଳେ ଗାଡି ରହିବା ଶବ୍ଦ ଶୁଭିଲା |ନିର୍ମଳା ତଳକୁ ଚାହିଁ ଖୁସି ହୋଇ କହିଲେ,ତାଙ୍କ ଗାଡି ଆସିଲାଣି,ମୁଁ ଯାଏଁ ଦେଖେ କିଏ ଆସିଛି |
ଗାଡି ନେଇ ସୁବ୍ରତବାବୁଙ୍କ ଡ୍ରାଇଭର ଆସିଥିଲା |ସେ ତା ସାଙ୍ଗରେ ଆସିଥିବା ଅନ୍ୟ ଜଣେ ବ୍ୟକ୍ତିଙ୍କ ସହାୟତାରେ ଘର ଭିତରକୁ ଦୁଇଟି ପେଟି ଆଣି ରଖିଲା |କହିଲା,ସାର ପଠେଇଛନ୍ତି |ସେ ଯିବାପରେ ନିର୍ମଳା ପେଟି ଖୋଲିଲେ |ଗୋଟିଏ ପେଟିରେ ଲଡ଼ୁ ଓ ଅନ୍ୟାନ୍ୟ ମିଠା ଥିବାବେଳେ ଅନ୍ୟ ପେଟିରେ ବିଭିନ୍ନ ପ୍ରକାର ଫଳ ଭର୍ତ୍ତି ହୋଇଥିଲା |ନିର୍ମଳା ନନ୍ଦିନୀକୁ ଚାହିଁ ହସି ହସି କହିଲେ,ଦେଖୁଛୁ ଆମ ସମୁଦୀଙ୍କୁ ?ଯାହା ତାଙ୍କ ମନକୁ ଆସୁଛି,ଆମ ଘରେ କୁଢ଼େଇ ପକାଉଛନ୍ତି,କିଛି ବାକି ରଖୁ ନାହାନ୍ତି |
ନନ୍ଦିନୀ ଦୀର୍ଘଶ୍ଵାସ ଛାଡି କହିଲା,ଦେଖୁଛି ଲୋ ଦେଖୁଛି,ଭଲକରି ଦେଖୁଛି ଆଉ ସବୁ ଜାଣି ପାରୁଛି |ବାଘ ତା ଶୀକାରକୁ ଝାମ୍ପ ମାରିବା ପରି,ସେ ତମମାନଙ୍କୁ ପୂରା କାବୁ କରି ସାରିଲେଣି,ଆଉ ମୁକୁଳିବାର ବାଟ ଦେଖା ଯାଉନାହିଁ |ଏକା ହରି ଭରସା |(କ୍ରମଶଃ)
No comments:
Post a Comment