ହୃଷିକେଶଙ୍କ ଘରେ ତିନିଟି ରୁମ ଥିଲା |ଗୋଟିକରେ ଅଙ୍କିତ ରହୁଥିବାବେଳେ ଦ୍ୱିତୀୟ ରୁମରେ ସେମାନେ ସ୍ୱାମୀ ସ୍ତ୍ରୀ ରହୁଥିଲେ |ତୃତୀୟ ରୁମ ସେମାନେ ତାଙ୍କର ଅତିଥି ମାନଙ୍କ ବ୍ୟବହାର ପାଇଁ ରଖିଥିଲେ |ବାହାଘର ଆଉ ଅଳ୍ପଦିନ ବାକିଥିବାବେଳେ ସୁବ୍ରତ ପ୍ରାୟ ପ୍ରତିଦିନ କିଛି ନାଁ କିଛି ଯୌତୁକ ସାମଗ୍ରୀ ପଠାଇବାରେ ଲାଗିଥିଲେ |ତେଣୁ ନିର୍ମଳା ସେମାନେ ରହୁଥିବା ବଡ଼ରୁମଟି ପୁଅବୋହୂଙ୍କ ପାଇଁ ଛାଡିଦେବାକୁ ନିଷ୍ପତ୍ତି କରି ସେହି ରୁମ ଖାଲି କରିଦେଲେ |ଇତିମଧ୍ୟରେ ସୁବ୍ରତ ନୂଆ ଏ.ସି.,ସ୍ମାର୍ଟ ଏଲଇଡି ଟିଭି, ଫ୍ରିଜ ଇତ୍ୟାଦି ଆଣି ତାକୁ ଯେଉଁଠି ଯାହା ଲାଗିବା କଥା ଲଗେଇ ସେହି ରୁମକୁ ସୁନ୍ଦର ଭାବରେ ସଜେଇବାରେ ଲାଗିଲେ | ଅଙ୍କିତ ଏସବୁ ଦେଖୁଥିଲା,କିନ୍ତୁ କିଛି କହୁ ନଥିଲା |ହୁଏତ ତା ମନରେ ଅନ୍ୟ କିଛି ଯୋଜନା ଚାଲିଥିଲା |
ଦିନେ ସେ ତା ଅଫିସରେ ବ୍ୟସ୍ତ ଥିବାବେଳେ ଏକ କଲ ଆସିଲା |truecaller ରେ ଫୋନ କରିଥିବା ବ୍ୟକ୍ତିର ନାମ ସୌମ୍ୟା ସଙ୍ଗୀତା ଦର୍ଶାଉଥିଲା |ସୌମ୍ୟା ଫୋନ କରିଛି ବୋଲି ଅଙ୍କିତ ଜାଣିପାରିଲା |ସେ ଫୋନକୁ ସାଙ୍ଗେ ସାଙ୍ଗେ ସାଇଲେଣ୍ଟ ମୋଡରେ ରଖି ନିଜ କାମ କରିବାକୁ ଲାଗିଲା |
ରାତିରେ ଘରକୁ ଫେରିବାପରେ ନିର୍ମଳା କହିଲେ,ତୋ ପାଇଁ ଗୋଟିଏ ଖୁସି ଖବର ଅଛି |ଅଙ୍କିତ ପଚାରିଲା,ତୁମର ଲଟେରୀ ଉଠିଗଲା ନାଁ କଣ ?କେତେ କୋଟି ଉଠିଲା ?ନିର୍ମଳା କୃତ୍ତିମ ଅଭିମାନରେ କହିଲେ,ତୋର ସବୁବେଳେ ସେଇକଥା |ଶୁଣ,ସମୁଦୀ କହୁଥିଲେ,ତୋର ମିନେରାଲ ୱାଟର ପ୍ଲାଣ୍ଟକୁ ଲାର୍ଜ ସ୍କେଲ ଇଣ୍ଡଷ୍ଟ୍ରିଜ କରିବାପାଇଁ ଚେଷ୍ଟା କରୁଛନ୍ତି |ଅଙ୍କିତ କହିଲା,ଆରେ ଭଲ ଖବର ତ ,କେବେ କରିବେ ?ଆଜି,କାଲି,ନାଁ ତା ପରଦିନ ??
ନିର୍ମଳା ଜାଣିପାରିଲେ ଅଙ୍କିତ ତାଙ୍କର ସବୁକଥା ମଜାରେ ନେଉଛି |ସେ କହିଲେ,ଆରେ ମୁଁ ମଜାରେ କହୁନି ,ସତରେ କହୁଛି |
ଅଙ୍କିତ କହିଲା,ମୁଁ ବି ମଜାରେ କହୁନି ମାମା,ସତରେ କହୁଛି |ଆଛା ଏଥିପାଇଁ ସେ କଣ ସବୁ ସର୍ତ୍ତ ରଖିଛନ୍ତି କହିଲ ?ନିର୍ମଳା କହିଲେ,ସେସବୁ କଥା ମୁଁ ଜାଣିନି |ଖାଲି କହୁଥିଲେ,ଏବେ ସେ ବାହାଘର ପାଇଁ ବ୍ୟସ୍ତ ଅଛନ୍ତି,ବାହାଘର ପରେ ଭାବିଚିନ୍ତି ଯାହା କରିବାର କଥା,କରିବେ |
ଅଙ୍କିତ କହିଲା,ବାସ ,ତମେ ବି ଆଉ ବ୍ୟସ୍ତ ନହୋଇ,ସେ ବିଷୟରେ ଆଲୋଚନା ନକଲେ ଭଲ |ଟିକିଏ ନୀରବ ରହି ନିର୍ମଳା ପଚାରିଲେ,ତତେ ଆଜି ସୌମ୍ୟା ଫୋନ କରିଥିଲା କି ?ଅଙ୍କିତ ନଜାଣିବା ପରି କହିଲା,ସେ କାହିଁକି ମତେ ଫୋନ କରିବ?ମୋଠାରେ ତାର କି କାମ ଅଛି ??ନିର୍ମଳା କହିଲେ,ସମୁଦୁଣୀ କହୁଥିଲେ ,ବାହାଘର ପୂର୍ବରୁ ପୁଅଝିଅ ଟିକେ କଥା ହୋଇଗଲେ ଭଲ,ସେଥିପାଇଁ ତୋ ଫୋନ ନମ୍ବର ମୁଁ ତାଙ୍କୁ ଦେଇଥିଲି |
ଅଙ୍କିତ ନିର୍ମଳାଙ୍କୁ ସ୍ଥିର ଦୃଷ୍ଟିରେ ଚାହିଁ କହିଲା,ଯାହା ସାଙ୍ଗେ ବେଶି କଥା ହୋଇଥିଲି,ତାକୁ ତ ତମେ ପସନ୍ଦ କଲନାହିଁ, ଏବେ ସୌମ୍ୟା ସାଙ୍ଗେ ଟିକେ କଥା ହୋଇଗଲେ,କୋଉ ତ୍ରିଭୁବନ ବିଜୟୀ ହୋଇଯିବି ଯେ ???(କ୍ରମଶଃ)
No comments:
Post a Comment