ହୃଷୀକେଶ ଅନୁପଙ୍କ ସହ କଥା ହେଉଥିବାବେଳେ ସୁବ୍ରତ ସେଠାରେ ପହଞ୍ଚିଲେ |ସେ ଦୁଇଜଣଙ୍କୁ ଅନ୍ତରଙ୍ଗ ଭାବରେ କଥା ହେଉଥିବାର ଦେଖି,ତାଙ୍କ ମୁହଁ ଶୁଖିଗଲା | ସେମାନଙ୍କ ଠାରୁ ଦୂରତା ରକ୍ଷାକରି ସେ କିଛି ଦୂରରେ ବସିଲେ |ଅନୁପ ଯିବାପରେ ସେ ହୃଷୀକେଶଙ୍କ ପାଖକୁ ଆସି ତାଙ୍କ ହାତ ଧରିପକାଇ କହିଲେ,ସମୁଦୀ,ମତେ କ୍ଷମା କରିଦେବେ |ହୃଷୀକେଶ କହିଲେ,ଆପଣ ଏମିତି କାହିଁକି କହୁଛନ୍ତି ?
ସୁବ୍ରତ କହିଲେ,ଆପଣ ଆଜି ସାରଙ୍କ ଠାରୁ କିଛି ସତ ଜାଣିଥିବେ |କିନ୍ତୁ ପୂରା ସତ ଆପଣଙ୍କୁ ନ କହିବା ପର୍ଯ୍ୟନ୍ତ ମତେ ଶାନ୍ତି ମିଳିବ ନାହିଁ |ତାପରେ ସେ ତାଙ୍କ କଥା ଆରମ୍ଭ କରି କହିଲେ,ଚାରିବର୍ଷ ତଳେ ଜଣେ ଇଞ୍ଜିନିଅରିଂ ଗ୍ରାଜୁଏଟ ଚାକିରୀ ପାଇଁ ତାଙ୍କ ପାଖକୁ ଆସିଥିଲା |ସେତେବେଳେ ତାଙ୍କ ବିଭାଗରେ କେତେଗୁଡିଏ ପୋଷ୍ଟ ପୂରଣ କରିବାପାଇଁ,ଦରଖାସ୍ତ ଆହ୍ୱାନ କରାଯାଇଥିଲା |ଚାକିରୀ ପାଇଁ ସୁବ୍ରତ ଏକ ସର୍ତ୍ତ ରଖିଥିଲେ |ତା ହେଲା,ଚାକିରୀ ବଦଳରେ ସେ ତାଙ୍କ ଝିଅକୁ ବିବାହ କରିବ |ଏଥିରେ ପିଲାଟି ଅତି ଖୁସିରେ ରାଜି ହୋଇଯାଇଥିଲା |ପିଲାଟିର ପରିବାର ସହ ବିବାହ ପାଇଁ କଥାବାର୍ତ୍ତା ହୋଇଥିଲା ଓ ସେମାନେ ମଧ୍ୟ ରାଜି ଥିଲେ |ଚାକିରୀ ପାଇବା ପରେ ଦୁହିଁଙ୍କ ବିବାହ ହେବ ବୋଲି ଏକପ୍ରକାର ଚୂଡାନ୍ତ ହୋଇଯାଇଥିଲା | ପିଲାଟି ବାରମ୍ବାର ତାଙ୍କ ଘରକୁ ଆସିବା ଭିତରେ ତା ସହିତ ସୌମ୍ୟାର ସମ୍ପର୍କ ଗଢି ଉଠିଥିଲା |ଯେହେତୁ ସେମାନଙ୍କ ବାହାଘର ହେବା କଥା ଫାଇନାଲ ହୋଇ ଯାଇଥିଲା,ସେମାନଙ୍କ ମିଳାମିଶାରେ ସୁବ୍ରତ ବାଧା ଦେଇ ନଥିଲେ |
କିନ୍ତୁ ଚାକିରୀ ପାଇବା ପରେ ପିଲାଟି ଆଉ ଧରାଛୁଆଁ ଦେଲାନାହିଁ ଓ ତାଙ୍କ ପିତାମାତା ପୁଅର ଇଛା ବିରୁଦ୍ଧରେ କିଛି କରିପାରିବେନାହିଁ ବୋଲି ସ୍ପଷ୍ଟ ମନା କରିଦେଲେ |ପ୍ରସ୍ତାବ ଭାଙ୍ଗିଯିବାପରେ ସୌମ୍ୟା ପାଗଳୀ ପ୍ରାୟ ହୋଇଗଲା ଓ ସେ ମାନସିକ ବ୍ୟାଧିର ଶୀକାର ହେଲା |ତାକୁ ସବୁବେଳେ ଖୁସି ପରିବେଶରେ ରଖିବାକୁ ଡାକ୍ତର ପରାମର୍ଶ ଦେଇଥିଲେ |ସେଥିପାଇଁ ସେ ତାକୁ ଏମ.ବି.ଏ.ପଢାଇଲେ |ଭାବିଥିଲେ,ପାଠପଢ଼ାରେ ମଜ୍ଜି ସେ ତାର ଅତୀତକୁ ପାଶୋରି ଦେବ |କିନ୍ତୁ ଯେତେ ଯାହା କଲେ ବି, ସେ ତାର ବେମାରୀରୁ ମୁକ୍ତି ପାଇଁ ପାରିଲା ନାହିଁ |ସୁବ୍ରତ ଛେପ ଢ଼ୋକି ପୁଣି କହିଲେ,ଆପଣଙ୍କ ପୁଅ ସହିତ ଯେତେବେଳେ ପ୍ରସ୍ତାବ ପଡିଲା,ମୁଁ ବହୁତ ଖୁସି ହୋଇଯାଇଥିଲି |ମୋର ଦୃଢ଼ ବିଶ୍ୱାସ ଥିଲା,ଝିଅ ମୋର ଆପଣଙ୍କ ଘରେ ଖୁବ ଖୁସିରେ ରହିବ |ସେଥିପାଇଁ ମୁଁ ଏହି ପ୍ରସ୍ତାବକୁ ହାତଛଡା କରିବାକୁ ଚାହିଁ ନଥିଲି |ଝିଅର ଖୁସି ପାଇଁ ମୁଁ ଆପଣଙ୍କୁ ତାର ଅତୀତ ଓ ବେମାରୀ କଥା ଲୁଚେଇଥିଲି |ସେଥିପାଇଁ ଆପଣ ମତେ କ୍ଷମା କରି ଦିଅନ୍ତୁ |
ସୁବ୍ରତଙ୍କ କଥା ଶୁଣି ଦୟା ଓ କରୁଣାରେ ହୃଷୀକେଶଙ୍କ ହୃଦୟ ବିଗଳିତ ହୋଇଗଲା |କିନ୍ତୁ ନିର୍ମଳା ସୁବ୍ରତଙ୍କ କଥାକୁ ବିଶ୍ୱାସ କରିପାରୁ ନଥିଲେ |ସେ ଭାବୁଥିଲେ,ସହାନୁଭୂତି ପାଇବା ପାଇଁ ସେ ପୁଣି କିଛି ନୂଆ ଚାଲ ଖେଳୁ ନାହାନ୍ତି ତ ?ହୃଷୀକେଶ କିଛି କହିବା ପୂର୍ବରୁ ସେ ସୁବ୍ରତଙ୍କ ମନ ରଖିବାପାଇଁ କହିଲେ,ଆମେ ଆପଣଙ୍କ କଥା ବୁଝିପାରୁଛୁ |କିନ୍ତୁ ଏ ସମୟରେ ଆପଣ ଝିଅ ପାଖରେ ରହିବା ନିହାତି ଦରକାର |କାରଣ ତାର ହୋସ ଆସିଲେ,ଆମକୁ ଦେଖି ହୁଏତ ତାର କିଛି ପ୍ରତିକ୍ରିୟା ସୃଷ୍ଟି ହୋଇପାରେ | (କ୍ରମଶଃ)
No comments:
Post a Comment