ଜାଇ ଅନୁକୂଳ ପରେ ବିବାହ ନିମନ୍ତ୍ରଣପତ୍ର ବଣ୍ଟନ ପ୍ରକ୍ରିୟା ଜୋରସୋରରେ ଆରମ୍ଭ ହୋଇଗଲା |ହୃଷିକେଶ ଓ ନିର୍ମଳା କେତେବେଳେ ଏକାଠି ଯାଉଥିଲେ ତ କେତେବେଳେ ପୃଥକ ଯାଇ ନିମନ୍ତ୍ରଣପତ୍ର ଦେଉଥିଲେ |ଅନେକଦିନ ପରେ ସେଦିନ ମାର୍କେଟରେ ଅଙ୍କିତକୁ ଦେଖି ସରୋଜ ପଚାରିଲା,ଏଇ କେଇଟା ଦିନରେ ତୁ ତ ଏକଦମ ଶୁଖି ଡାଙ୍ଗ ହୋଇ ଗଲୁଣି ?କଣ ହୋଇଛି,ଦେହ ଭଲ ନାହିଁ ??ଅଙ୍କିତ ଫିକା ହସି କହିଲା,ଆଉ ଏ ଜୀବନରେ କଣ ସୁଖ ବାକି ରହିଲା ଯେ ଦେହ ଭଲ ରହିବ ?ଏଣିକି ଖାଲି ମୃତ୍ୟୁ ପାଇଁ ଅପେକ୍ଷା କରିବା କଥା |
ସରୋଜ କହିଲା,ତୋପରି ଏମିତି କେତେ ରଥି ମହାରଥୀ କେତେ ବଡ଼ ବଡ଼ ଭାଷଣ ଦେଇ ଶେଷରେ ଲାଙ୍ଗୁଡ଼ ଜାକି ଆତ୍ମସମର୍ପଣ କରିଛନ୍ତି |ତୋର ବି ସେଇଆ ହେବ |ବାହାଘର ପରେ ,ମିସେସ ଆସିଲେ ତତେ ଯେତେବେଳେ ସାବାଡ଼ କରିଦେବ,ତୁ ଯିବୁ କୁଆଡେ ??ତା କଥାରେ ଉଠ ବସ ହେବା ବ୍ୟତୀତ ତୋର ଆଉ କିଛି ଉପାୟ ନଥିବ |ଅଙ୍କିତ ରାଗିଯାଇ କହିଲା,କିଏ ସେ ମିସେସ,କାହାର ମିସେସ ?ଯାହାକୁ ଜାଣିନି,ଚିହ୍ନିନି,ସିଏ ??ମୁଁ କେବଳ ଏକମାତ୍ର ଜଣକୁ ମୋ ଜୀବନସାଥୀ ରୂପେ ସ୍ଵୀକାର କରି ସାରିଛି,ସେ ମୋର ଲିପି |ସେ ଯଦି ମୋ ଜୀବନକୁ ନ ଆସିଲା,ତାହେଲେ ବଞ୍ଚିଥିବା ଯାକେ କାହାକୁ ମୁଁ ଏ ଅଧିକାର ଦେଇ ପାରିବିନି |ମାମା ଯେମିତି ତାଙ୍କ ଜିଦ୍ଦି ରଖିଲେ,ମୁଁ ବି ସେମିତି ମୋ ଜିଦ୍ଦି ରଖିବି |ସରୋଜ ପଚାରିଲା,ତୋର ପୁଣି କି ଜିଦ୍ଦି ଅଛି,ମତେ କହିଲୁ ?ଅଙ୍କିତ କହିଲା,ନାଁ,ମୋର କାହାକୁ କିଛି କହିବାର ନାହିଁ,ଯାହା କରିବାର କଥା ମୁଁ କରିବି |ତା କଥା ଶୁଣି ସରୋଜର ମନ ଭାରାକ୍ରାନ୍ତ ହୋଇଗଲା |ସେ ପଚାରିଲା,ଏହାର କଣ ସମାଧାନ ନାହିଁ ?ଅଙ୍କିତ ଫିକା ହସ ହସି କହିଲା,କିଛି ସମାଧାନ ନାହିଁ ,ଯାହା ହୋଇବାର କଥା,ହୋଇ ସାରିଛି |ଯେଉଁମାନେ ମତେ ଜାଣିଶୁଣି ଅନ୍ଧାରୀକୂପକୁ ଠେଲି ଦେଇଛନ୍ତି,ମୁଁ ଯିବାପରେ ସେମାନଙ୍କୁ ଦିନେ ନାଁ ଦିନେ ଏହାର ଉତ୍ତର ଦେବାକୁ ପଡିବ |
ବାହାଘରର ଦୁଇଦିନ ପୂର୍ବରୁ ନନ୍ଦିନୀ ଆସି ପହଞ୍ଚିଗଲା |ସେ ନିର୍ମଳାଙ୍କର ଡାହାଣ ହାତ,ନିର୍ମଳା ତା ଆସିବା ବାଟକୁ ଚାତକ ପରି ଚାହିଁ ବସିଥିଲେ |ସେ ଘରେ ପାଦ ଦେଉ ଦେଉ ଘରେ ଗହଳି ଜମିଗଲା |ଆସିଲାବେଳେ ସାଙ୍ଗରେ ସେ ଗୋଟିଏ ହାତଲେଖା ଖାତା ଆଣିଥିଲା |ସେଥିରେ ବେଦୀର ସମସ୍ତ କର୍ମ ପାଇଁ କି କି ସାମଗ୍ରୀ ଦରକାର,ବିସ୍ତୃତ ଭାବରେ ଲେଖା ହୋଇଥିଲା |ସେଇ ଅନୁସାରେ ସବୁ ପରକୁ ପର ସବୁ ଯୋଗାଡ଼ କରି ରଖିଦେଲେ,ଠିକଣା ବେଳେ ଆଉ ବ୍ୟସ୍ତ ହେବାକୁ ପଡିବ ନାହିଁ |ନିର୍ମଳା ତା କଥା ଶୁଣି ଖୁସି ହୋଇ କହିଲେ,ମୁଁ ଜାଣେ ପରା ମୋ ଭଉଣୀ ମୁଣ୍ଡରେ ବହୁତ ବୁଦ୍ଧି !ସେ ନ ଆସିଲେ କଣ କିଛି କାମ ହୋଇ ପାରିବ ?ଓହୋଃ ,ମୋ ଚିନ୍ତା ଗଲା |
ନନ୍ଦିନୀ କହିଲା,ମୋ ଶାଢ଼ୀ ଆଗେ ଦେଖା,ତାପରେ ଯୋଉ କଥା |ନିର୍ମଳା କହିଲେ,ତୁ କଣ ମତେ ଏତେ ବୋକୀ ବୋଲି ଭାବିଛୁ ?ତୋ ଶାଢ଼ୀ ତୁ ପସନ୍ଦ କରିବୁ,ମୁଁ ଜମା ସେ ଭୁଲ କରିବି ନାହିଁ |ତୁ ତ ଡେରିରେ ଆସିଲୁ,ଆଗରୁ ଆସିଥିଲେ,ବ୍ଲାଉଜ ଟେଲରକୁ ଦେଇଥିଲେ,ସେ କରି ଦେଇଥାନ୍ତା |ନନ୍ଦିନୀ କହିଲା,ଆଜିକାଲି ରେଡ଼ିମେଡ଼ ବ୍ଲାଉଜର ବହୁତ ଡିମାଣ୍ଡ |ମୋ ପାଖରେ ସେମିତି ବହୁତ ବ୍ଲାଉଜ ଅଛି,ତୁ ଆଦୌ ବ୍ୟସ୍ତ ହୁଅନା |(କ୍ରମଶଃ)
No comments:
Post a Comment