ଅଙ୍କିତର ଏକ କ୍ଷୁଦ୍ର ମିନେରାଲ ୱାଟର ପ୍ଲାଣ୍ଟ ବିଜିନେସ ଥିଲା |ଏହାଛଡା ଭବିଷ୍ୟତରେ ପେପର କପ ,ପ୍ଲେଟ,ଓ ଟିସୁ ପେପର ଇତ୍ୟାଦି ଉତ୍ପାଦନ କରିବାର ଯୋଜନା ସେ କରୁଥିଲା |ତାର ବ୍ୟବସାୟିକ ବୁଦ୍ଧିମତ୍ତାକୁ ଭାବି ଶ୍ୱଶୁର ସୁବ୍ରତ ବାବୁ ଭଲଭାବେ ଆକଳନ କରି ପାରିଥିଲେ |ସେଥିପାଇଁ ସେ ଏପରି ପ୍ରସ୍ତାବକୁ ହାତଛଡା କରିବାକୁ ଚାହୁଁ ନଥିଲେ |ପୁଅ ଚାହିଁଲେ ଝିଅ ସହିତ କଥାବାର୍ତ୍ତା କରି ପାରିବ ବୋଲି ସେ ଶୁଭ୍ରାଙ୍କ ଜରିଆରେ ନିର୍ମଳାଙ୍କୁ ଜଣାଇ ଦେଇଥିଲେ ଓ ସୌମ୍ୟାର ଫୋନ ନମ୍ବର ମଧ୍ୟ ତାଙ୍କୁ ଦେଇଥିଲେ |ନିର୍ମଳା ଏକଥା ଅଙ୍କିତକୁ କହିବା ପାଇଁ ଅନେକଥର ଚେଷ୍ଟାକରି ମଧ୍ୟ ତାକୁ କହିବାକୁ ସାହସ ଜୁଟାଇ ପାରିନଥିଲେ |ତେଣୁ ଏହି ପ୍ରସ୍ତାବ କେବଳ ପ୍ରସ୍ତାବରେ ହିଁ ରହି ଯାଇଥିଲା |
ନିର୍ମଳାଙ୍କ ଏକମାତ୍ର ବିବାହିତା ସାନଭଉଣୀ ନନ୍ଦିନୀ ତାର ପରିବାର ସହ ବାରିପଦାରେ ରହୁଥିଲା |ସେ ଅତ୍ୟନ୍ତ କର୍ମଚଞ୍ଚଳ ଓ ଏହିସବୁ କାମରେ ବିଶେଷ ଜ୍ଞାନ ରଖିଥିଲା |ଏକୁଟିଆ ସବୁକାମ ବୁଝାବୁଝି କରିବା ନିର୍ମଳାଙ୍କ ପକ୍ଷରେ କଷ୍ଟକର ଥିବାରୁ ନିର୍ବନ୍ଧର ଦୁଇଦିନ ପୂର୍ବରୁ ସେ ନନ୍ଦିନୀକୁ ଡକେଇ ଆଣିଲେ |ନନ୍ଦିନୀ ତାର ଦୁଇ ପିଲାଙ୍କ ସହ ଘରକୁ ଆସିଯିବା ପରେ ନିସ୍ତବ୍ଧ ଘରଟି ଆନନ୍ଦ ମୁଖରିତ ହୋଇ ଉଠିଲା |ଦୁଇଭଉଣୀ ମିଶି ନିର୍ବନ୍ଧ ପାଇଁ ଜୋରଦାର ପ୍ରସ୍ତୁତିରେ ଲାଗି ପଡିଲେ |ବାହାଘରରେ ଅଙ୍କିତର ଇଚ୍ଛା ନାହିଁ ବୋଲି ନିର୍ମଳା ନନ୍ଦିନୀକୁ ଜଣେଇ ନଥିଲେ |
ନିର୍ବନ୍ଧରେ ରିଙ୍ଗ ସେରିମନି କରିବାପାଇଁ ଶୁଭ୍ରାଙ୍କର ବିଶେଷ ଅନୁରୋଧକୁ ହୃଷିକେଶ ଓ ନିର୍ମଳା ଗ୍ରହଣ କରିଥିଲେ |ଝିଅଘର ପୁଅକୁ ହୀରା ମୁଦି ଦେଉଥିବା କଥା ସେମାନଙ୍କ କାନରେ ପଡି ସାରିଥିଲା |ପୁଅଘର ହୋଇ ସେମାନେ ବି ପଛରେ ରହିଥାନ୍ତେ କେମିତି ?ନିର୍ମଳା ନନ୍ଦିନୀ ସହିତ ମାର୍କେଟ ଯାଇ ନିଜ ପସନ୍ଦରେ ସୌମ୍ୟା ପାଇଁ ମୂଲ୍ୟବାନ ହୀରା ମୁଦି ବାଛି ଆଣିଲେ |
ନନ୍ଦିନୀ ଆସିଥିବାରୁ ନିର୍ମଳାଙ୍କୁ ବହୁତ ସୁବିଧା ହେଉଥିଲା |ବିଶେଷ କରି ନିର୍ବନ୍ଧ ପାଇଁ ତାଙ୍କର ଯେଉଁ କଥା ଅଙ୍କିତକୁ କହିବାକୁ ପଡୁଥିଲା,ସେ ନନ୍ଦିନୀ ଦ୍ୱାରା ସେ କାମ କରାଇ ନେଉଥିଲେ |ଅଙ୍କିତ ନନ୍ଦିନୀକୁ କୌଣସି ଜିନିଷ ମନା କରିପାରୁନଥିଲା |ଏଥିପାଇଁ ନିର୍ମଳାଙ୍କ ଆନନ୍ଦର ସୀମା ନଥିଲା |ପୁଅ ଶେଷକୁ ବୁଝିଗଲା ଭାବି ମନେ ମନେ ସେ ବହୁତ ଖୁସି ହେଉଥିଲେ |କିନ୍ତୁ ତା ମନରେ କଣ ବିତୁଛି,ସେକଥା କେବଳ ଅଙ୍କିତ ହିଁ ଜାଣିଥିଲା |ତାର ଭୋକ ଶୋଷ ମରିଯାଇଥିଲା |ସେ କେବଳ ଲିପି କ|ଥା ଚିନ୍ତା କରି ତାକୁ ମନେ ମନେ ଝୁରି ହେଉଥିଲା |
ପୁଅଘର ଓ ଝିଅଘର ତରଫରୁ ତିନିଶହ ପାଖାପାଖି ଲୋକ ଆସିଥିଲେ |ସେମାନେ ସମସ୍ତେ ଯେପରି ଭଲରେ ଖାଇବେ ଓ କାହାର ଯେପରି କିଛି ଅସୁବିଧା ନହେବ ଉଭୟ ନିର୍ମଳା ଓ ନନ୍ଦିନୀ ସେକଥା ବୁଝୁଥିଲେ |ରିଙ୍ଗ ସେରିମନି ପରେ ଖାଇବା ପର୍ବ ଆରମ୍ଭ ହୋଇଗଲା |ଗୋଟିଏ ସ୍ଥାନରେ ଝିଅଘର ତରଫରୁ ଆସିଥିବା କିଛି ମହିଳା କୌଣସି ଏକ ଗୁରୁତ୍ତ୍ୱପୂର୍ଣ୍ଣ ଆଲୋଚନାରେ ବ୍ୟସ୍ତ ଥିବାର ଦେଖି,ନିର୍ମଳା କୌତୂହଳୀ ହୋଇ ନିଃଶବ୍ଦରେ ସେଠାକୁ ଯାଇ ତାଙ୍କ ପଛପଟେ ନ ଜାଣିବା ପରି ଛିଡ଼ାହେଲେ |ସେମାନଙ୍କ ଭିତରେ ଥିବା ଅପେକ୍ଷାକୃତ ବୟସ୍କା ମହିଳା ଜଣକ କହୁଥିଲେ, ପୁଅଘର କଣ ଦେଖି ଝିଅ ସାଙ୍ଗେ ବାହାଘର କରିବାପାଇଁ ରାଜି ହେଲେ କେଜାଣି,ପଛକୁ ଭଲକରି ନାମ ନେବେ ଯେ |ଅଖା ଧୋଉଥିବେ,ଗୁଣ ଗାଉଥିବେ |ବାହାଘର କଣ ପିଲାଖେଳ ହୋଇଛି,ସବୁ ଵୁଝିଵାଝି କରିବା କଥା ନାଁ !ତାଙ୍କ ସାମ୍ନାରେ ବସିଥିବା ଅନ୍ୟ ଜଣେ ମହିଳା ତାଙ୍କ କଥା ଶୁଣି କହିଲେ ,ଝିଅଟା କଣ ଏତେ ବଦନାମ ହୋଇ ଯାଇଛି ?କଣ ଏମିତି କାଣ୍ଡ କରିଛି କହିଲ,ଆମେ ବି ଟିକେ ଜାଣିବା | (କ୍ରମଶଃ)
No comments:
Post a Comment