ଲିପିର ଦୁଇଭଉଣୀ ଥିଲେ |ମଝିଆଁ ଭଉଣୀର ନାମ ପ୍ରଜ୍ଞା ଓ ସାନଭଉଣୀର ନାମ ଥିଲା ପ୍ରାଚୀ |ପ୍ରଜ୍ଞାର ବି.ଏସ.ସି ଶେଷବର୍ଷ ଥିବାବେଳେ ପ୍ରାଚୀ ମାଟ୍ରିକ ପରୀକ୍ଷା ଦେବାପାଇଁ ପ୍ରସ୍ତୁତ ହେଉଥିଲା |ପ୍ରାଚୀ ଟିଉସନରୁ ଫେରିବାବେଳେ ଅଙ୍କିତ ତାକୁ ଦେଖି ଅଭ୍ୟାସବଶତଃ ତା ପାଖରେ ବାଇକ ରଖି କହିଲା,ଏ ପୁଚି, (ଡାକନାମ )ଶୁଣ |ପ୍ରାଚୀ କହିଲା,ନାଁ ମୋର କିଛି ଶୁଣିବାର ନାହିଁ,ଡେରି ହେଲାଣି ବୋଉ ବ୍ୟସ୍ତ ହେଉଥିବ |ଅଙ୍କିତ କହିଲା,ମୋ ସାଙ୍ଗେ କଥା ହେବାକୁ ଦେଈ ମନା କରିଛି ନାଁ ?ହଉ,ତୋ ଦେଈକୁ କହିଦେବୁ,ଭଲକରି କ୍ଷୀରି ପିଠା ଖାଇବ,ମୋ ବାହାଘର ଠିକ ହୋଇଗଲା |ଆଉ କହିବୁ,ଠାକୁରଙ୍କୁ ଡାକିବ,ମୁଁ ଯେମିତି ଶୀଘ୍ର ମରିଯାଏ,ତାହେଲେ ଆହୁରି ଭଲକରି ଭୁରି ଭୋଜନ ଖାଇବ |
ପ୍ରାଚୀ ବିରକ୍ତ ହୋଇ କହିଲା,ସେମିତି କାହିଁକି କହୁଛ ,ମୋ ଦେଈ କଣ କଲା ?ଆମର ଭାଇ ନାହିଁ,ଚପରାଶି ଝିଅ ବୋଲି ତ ଆଣ୍ଟି ମନା କରିଦେଲେ,ଏଥିରେ ମୋ ଦେଈର କଣ ଭୁଲ ରହିଲା ?
ଅଙ୍କିତ କହିଲା,ତୋ ଦେଈ କିଛି ଭୁଲ କରିନି ?ବାପା ମାଆ କଣ ସବୁ ବାହାଘରରେ ରାଜି ଥାଆନ୍ତି ?ପଛରେ ସେମାନେ ରାଜି ହୁଅନ୍ତି |ହେଲେ ତୋ ଦେଈ ମୋ ସାଙ୍ଗେ କଥାବାର୍ତ୍ତା କରିବା ଦୂରର କଥା,ମତେ ଦେଖୁ ଦେଖୁ ଚୋର ଚଣ୍ଡାଳ ପରି ଘଉଡ଼େଇ ଦେଲା |ମୁଁ କଣ ଏତେ ଖରାପ ?ମୋ ମାମା କଣ କହିଲେ,ସେଥିପାଇଁ ମୁଁ କେମିତି ଦୋଷୀ ହେଲି ?ହଉ ଠିକ ଅଛି,ମୁଁ ବହୁତ ଖରାପ,ଦେଈକୁ କହିବୁ, ଭଲ ମଣିଷଟିଏ ଖୋଜି ତାକୁ ବାହାହୋଇ ,ତା ସାଙ୍ଗେ ଭଲରେ ରହିବ |
ପ୍ରାଚୀ କହିଲା,ସେ ବାହା ହେଉ କି ନହେଉ ତମର କି ଯାଏ ଆସେ ?ତମେ ପୁଳାଏ ଯୌତୁକ ଆଣି ଯାହାକୁ ବାହା ହଉଛ,ତା ସାଙ୍ଗେ ଭଲରେ ରୁହ |ଯୌତୁକ କଥା ଶୁଣି ଅଙ୍କିତର ମୁହଁ ଶୁଖିଗଲା |ସେ କହିଲା, ତୁ ବି ଶେଷରେ ସେଇୟା କହିଲୁ ?ପ୍ରାଚୀ କହିଲା,ହଁ କହିବି,ଆହୁରି କହିବି,ଭଲକରି କହିବି |ଦେଈକୁ ତମେ ବହୁତ ବଦନାମ କରି ସାରିଲଣି, ବାଟରେ ଘାଟରେ କଥା ହୋଇ,ଆମକୁ ଆଉ ବଦନାମ କରନା |ସେ ତା ସାଇକେଲ ଚଲାଇ ଚାଲିଗଲା |
ଅଙ୍କିତର ମନ ଖରାପ ହୋଇଗଲା |ଯେଉଁ କାମପାଇଁ ସେ ଯାଉଥିଲା,ତାର ଆଉ ଯିବାକୁ ମନ ହେଲାନାହିଁ | ସେ ଘରକୁ ଫେରି ଆସିବାକୁ ବାହାରିଥିବା ବେଳେ,ସରୋଜ ଆସି ସେଠାରେ ପହଞ୍ଚିଲା |କହିଲା,ଆରେ ତୁ ଏପର୍ଯ୍ୟନ୍ତ ଦୋକାନକୁ ଯାଇନୁ ?କଷ୍ଟମର ଆସି ଫେରି ଯାଉଛନ୍ତି |ଅଙ୍କିତ କହିଲା,ଫେରି ଯାଆନ୍ତୁ |ମୋ ମନ ଭଲନାହିଁ,ଆଜି ମୁଁ ଯିବିନି |ସେ ପୁଣି କହିଲା,ମୁଁ ନ ମରି କାହିଁକି ବଞ୍ଚିଛି କେଜାଣି !ସବୁଦିନ ଏତେଲୋକ ମରୁଛନ୍ତି,ମତେ କାହିଁକି ମରଣ ଆସୁନି ?କଣ ପାଇଁ ଠାକୁର ମତେ ବଞ୍ଚେଇ ରଖିଛନ୍ତି ??ସରୋଜ ହସି ହସି କହିଲା,କାହିଁକି ସେମିତି ପିଲାଙ୍କ ପରି ହେଉଛୁ ?ଦୁଃଖ ଆଉ କାହାକୁ ଆସୁନି,ଖାଲି ତତେ ଏକା ଆସୁଛି |ମନ ଭଲ ହେବାର ମେଡ଼ିସିନ ମୋ ପାଖରେ ଅଛି |ଚାଲ ଆମ ଘରକୁ ଯିବା |ସେ ଅଙ୍କିତକୁ ତା ଘରକୁ ନେଇଗଲା |ସେଠାରେ ସେ ତାକୁ ମଦ ଅଫର କଲା |ଅନ୍ୟ ଦିନ ହୋଇଥିଲେ,ଅଙ୍କିତ ତା ଉପରେ ବିରକ୍ତ ହୋଇଥାନ୍ତା |କିନ୍ତୁ ସେଦିନ ସେ ବିନା ପ୍ରତିବାଦରେ ପେଗ ପରେ ପେଗ ପିଇ ଚାଲିଲା |(କ୍ରମଶଃ)
No comments:
Post a Comment