ସୌମ୍ୟା ଅଙ୍କିତକୁ ବାହାଘର ବେଳେ ଯେତିକି ଦେଖିଥିଲା ସେତିକି |ଶାଶୁଘରକୁ ଆସିବା ପରଠାରୁ ,ଅଙ୍କିତ ସହିତ ତାର ଥରେ ବି ଦେଖା ହୋଇନଥିଲା |
ଚତୁର୍ଥୀ ଦିନ ସକାଳେ ବେଦିରେ ହୋମ ଓ ଅନ୍ୟାନ୍ୟ କାର୍ଯ୍ୟ ବିଧି ମୁତାବକ ହେଲା |ସେଦିନ ଅନେକ ରାତିରେ ସାଧାସିଧା ପୋଷାକରେ ଅଙ୍କିତ ସୌମ୍ୟା ପାଖକୁ ଆସିଲା ଓ ପଲଙ୍କ ସାମ୍ନାରେ ପଡିଥିବା ସୋଫାରେ ବସି କିଛି ସମୟ ଚିନ୍ତାକରି କହିଲା,ମୋର ତୁମକୁ ଆଜି ଦୁଇଟି କଥା କହିବାର ଅଛି |ଭଲକରି ମନଦେଇ ଶୁଣ |ତା ଉପରେ ତମର ଯାହା ବି କହିବାର ବା ପଚାରିବାର ଅଛି,କରିପାରିବ |କିନ୍ତୁ ୟାପରେ ସେ ବିଷୟରେ ମତେ କେବେ ବି କିଛି ପଚାରିବନି କି କହିବନି |ମୋ କଥାରେ ଯଦି ରାଜି ଅଛ ତାହେଲେ ମୁଁ ମୋ କଥା କହିବି |ସୌମ୍ୟା ଉତ୍କଣ୍ଠିତ ହୋଇ କହିଲା,ହଁ ,କୁହ |ଅଙ୍କିତ କହିଲା,ମୋର ଗୋଟିଏ ଝିଅ ସହିତ ସମ୍ପର୍କ ଥିଲା ଓ ମୁଁ ତାକୁ ବହୁତ ଭଲ ପାଉଥିଲି |ତା ଛଡ଼ା ମୁଁ ଆଉ କାହାକୁ ମୋ ହୃଦୟରେ ସ୍ଥାନ ଦେଇ ପାରିବି ନାହିଁ | ଯେପର୍ଯ୍ୟନ୍ତ ମୁଁ ମୋ ମାଇଣ୍ଡ ମେକଅପ ନ କରିଛି, ସେପର୍ଯ୍ୟନ୍ତ ତମ ସହିତ ମୋର କୌଣସି ସମ୍ପର୍କ ରହିବ ନାହିଁ |ଅନ୍ୟଟି ହେଲା,ତମର ଯେତେବେଳେ ଯାହା କିଛି ଦରକାର ହେବ, ତମେ ମତେ ନକହି ମାମାଙ୍କୁ କହିବ |ଏତିକି |
ଅଙ୍କିତ କଥା ଶୁଣି ସୌମ୍ୟା ହସିଦେଇ କହିଲା,ଓଃ !ଏଇକଥା ?ମୁଁ ଭାବିଲି ଆଉ କିଛି ସିରିଅସ କଥା କହିବ |ଶୁଣ,ଏଇ ଯେଉଁ ଭଲପାଇବା କଥା କହିଲ,ସେକଥା ଆଜିକାଲି ସମସ୍ତେ କରୁଛନ୍ତି,କିଏ ସ୍ୱୀକାର କରୁଛନ୍ତି,କିଏ କରୁନାହାନ୍ତି |ମୋ ସାଙ୍ଗରେ ଯେତେ ଝିଅ ପଢୁଥିଲେ,ସମସ୍ତଙ୍କର ବୟ ଫ୍ରେଣ୍ଡ ଥିଲେ |କିନ୍ତୁ ପାଠପଢା ସରିବା ପରେ,ଯିଏ ଯାହା ବାଟରେ ଗଲେ ଆଉ ଯାହାକୁ ଇଛା ତାକୁ ବାହାହେଲେ |ସମସ୍ତେ ବେଶ ଖୁସିରେ ଅଛନ୍ତି ;ରାତ ଗୟି,ବାତ ଗୟି |କମ ବୟସରେ ଯେଉଁ ଭୁଲ ହୋଇଯାଏ ,ତାକୁ କେହି ଭୁଲ ବା ଦୋଷ ବୋଲି ମାନନ୍ତି ନାହିଁ |ଆଜିକାଲି ଏଇ ପ୍ରେମ ଫ୍ରେମ ସବୁ ବେକାର କଥା |ମୁଁ ଏସବୁ ମାନେନା |ଟିକିଏ ରହି ସେ କହିଲା,ମୋର ବି କିଛି କଥା ତମକୁ କହିବାର ଅଛି |ପ୍ରଥମଟି ହେଲା, ସକାଳେ ଡେରିରେ ଉଠିବା ମୋର ଅଭ୍ୟାସ |ତେଣୁ ବଡ଼ି ଭୋରରୁ ମୁଁ ଉଠି ପାରିବି ନାହିଁ | ଦ୍ୱିତୀୟ ହେଲା,ହୋଟେଲ ଜିନିଷ ଓ ନନ ଭେଜ ଖାଇବାକୁ ମୁଁ ବହୁତ ଭଲପାଏ |ସେଥିପାଇଁ ମତେ ମନା କରିବନି |ତୃତୀୟରେ,ପୂଜାପାଠ ଓ ଉପବାସ ମୁଁ କରି ପାରେନା |ତେଣୁ ମତେ ସେଥିପାଇଁ ବାଧ୍ୟ କରିବନି |ଚତୁର୍ଥରେ, ମୋର ଡାଡି ମମି ମୋର ଜୀବନ,ସେମାନଙ୍କୁ ମୁଁ ବହୁତ ଭଲପାଏ | ମୋର ଯେତେବେଳେ ଇଛା ହେବ, ସେତେବେଳେ ମୁଁ ସେମାନଙ୍କ ପାଖକୁ ଯିବି ଓ ସେଥିରେ କାହାରି ଆପତ୍ତି ରହିବ ନାହିଁ | ପଞ୍ଚମରେ,ଚାକିରୀ କରିବାକୁ ମୁଁ ବହୁତ ଇଣ୍ଟରଭିଉ ଦେଇଛି,ଆଗକୁ ମଧ୍ୟ ଦେବି |ଚାକିରୀ ପାଇଗଲେ,ଚାକିରୀ କରିବାକୁ ତମେ ମତେ ଅନୁମତି ଦେବ |ଷଷ୍ଠ ଓ ସବା ଶେଷକଥାଟି ହେଲା,ମୁଁ ଯେତେବେଳେ ସପିଂ କରିବାକୁ ଯିବି,ତମ ଏଟିଏମ କାର୍ଡ ମତେ ଦେବ |
ତାର କଥା ଶେଷ କରି ସୌମ୍ୟା ମତାମତ ପାଇଁ ,ଅଙ୍କିତ ଆଡକୁ ଚାହିଁଲା |କିନ୍ତୁ ସେତେବେଳକୁ ଅଙ୍କିତ ସୋଫାରେ ନିଘୋଡ଼ ନିଦରେ ଶୋଇ ଯାଇଥିଲା |(କ୍ରମଶଃ)
No comments:
Post a Comment