ପରଦିନ ଅଫିସରେ ଆଦିକନ୍ଦଙ୍କୁ ଜଣେ ଯୁଦ୍ଧ ଫେରନ୍ତା ବିଜୟୀ ସେନାପତି ପରି ସମ୍ବର୍ଦ୍ଧନା ଦିଆଗଲା |ତାଙ୍କର ଶତ୍ରୁ ମିତ୍ର ସମସ୍ତେ ଏକାକାର ହୋଇଯାଇଥିଲେ |କର୍ମଚାରୀ ମାନଙ୍କର ଏପରି ବିପୁଳ ଉତ୍ସାହ ଓ ଉଦ୍ଦୀପନା ଦେଖି ନିଜେ ନିର୍ଦ୍ଦେଶକ ମଧ୍ୟ ଆଦିକନ୍ଦଙ୍କ ସିଟ ପାଖକୁ ଆସି ତାଙ୍କୁ ଶୁଭେଚ୍ଛା ଜଣେଇଲେ ଓ ତାଙ୍କ ପ୍ରତି ହୋଇଥିବା ଅନ୍ୟାୟ ପାଇଁ ଦୁଃଖ ପ୍ରକାଶ କଲେ |ଦାସ ସାର ତାଙ୍କ ରୁମ ଭିତରେ ବସିଥିଲେ,ଆଉ ବାହାରକୁ ବାହାରିଲେ ନାହିଁ |କିଛି ସମୟ ପରେ ଦେହ ଖରାପ ବାହାନା କରି,ହାଫ ଡେ ସି.ଏଲ.ନେଇ ଘରକୁ ଚାଲିଗଲେ |ତାଙ୍କର ସନ୍ଦେହଜନକ ଚାଲିଚଳନ ଦେଖି,ଏହି ଘଟଣାରେ ତାଙ୍କର ସମ୍ପୃକ୍ତି ନେଇ ଅଫିସରେ ଆଲୋଚନା ହେଲା |
ଏଣେ ଗଣମାଧ୍ୟମର ପ୍ରବଳ ଚାପ ଯୋଗୁଁ ସମ୍ପୃକ୍ତ ଭିଜିଲାନ୍ସ କର୍ମଚାରୀଙ୍କୁ ସସ୍ପେଣ୍ଡ କରାଯାଇ,ସେମାନଙ୍କ ବିରୁଦ୍ଧରେ ଦୋଷାରୋପ ଚିଠା ଆଗତ କରାଗଲା |ସପ୍ତାହକ ଭିତରେ ସୁଦୂର କୋରାପୁଟକୁ ଦାସ ସାରଙ୍କ ଟ୍ରାନ୍ସଫର ହୋଇଗଲା |ଏମିତି ପରିସ୍ଥିତିରେ ସେ ଅଫିସରୁ ବିଦାୟ ନେଇ ଗଲେ ଯେ ,ତାଙ୍କ ପାଇଁ ଫେୟାରୱେଲ ମିଟିଂ ଦୂରର କଥା,ତାଙ୍କୁ ବାଟୋଇ ଦେବାପାଇଁ କେହି ଜଣେ ହେଲେ ଆସିଲେ ନାହିଁ |********
ଏହା ଭିତରେ ଦୀର୍ଘ ଚାରିବର୍ଷ ବିତିଗଲା |ଆଦିକନ୍ଦ ପୁଣି ଆଉ ଗୋଟିଏ ପଦୋନ୍ନତି ପାଇ ସାରିଥିଲେ |ଅନିଷ ଚେଷ୍ଟାକରି ହାଇଦ୍ରାବାଦରେ ଅନ୍ୟ ଏକ କମ୍ପାନୀରେ ଜଏନ କରିଥିଲା |କିନ୍ତୁ ଦିବ୍ୟାଶା ପୂର୍ବବତ ସେହି ଚେନ୍ନାଇରେ ଥିଲା |ଭାଇ ତାର ଡିପ୍ଲୋମା ଇଞ୍ଜିନିଅରିଂ ଶେଷ କରି ଚାକିରୀ ଖୋଜୁଥିଲା |ଅନସୂୟା ଭାବିଥିଲେ,ଦିବ୍ୟାଶା ହାଇଦ୍ରାବାଦ ଆସିଲେ ବାହାଘରପାଇଁ, ବିଧି ମୁତାବକ ତାଙ୍କ ପକ୍ଷରୁ ବିବାହ ପ୍ରସ୍ତାବ ଦେବେ |କିନ୍ତୁ ତାହା ହୋଇ ନପାରିବାରୁ ସେ ବହୁତ ନିରାଶାରେ ଥିଲେ |
ଦିନେ ଖରାବେଳେ ଅନସୂୟା ଅତ୍ୟନ୍ତ ଚିନ୍ତାଗ୍ରସ୍ତ ହୋଇ ବସିଥିବାବେଳେ ଭାରତୀଙ୍କ ଫୋନ ଆସିଲା |ଭାରତୀ ତାଙ୍କ ସହିତ ଅନେକ ସମୟ ଗପିବା ପରେ କହିଲେ,ଦେବୁ ପାଇଁ ବହୁତ ପ୍ରସ୍ତାବ ଆସୁଛି,କିନ୍ତୁ ମୁଁ ଆପଣଙ୍କ ପ୍ରସ୍ତାବକୁ ଅପେକ୍ଷା କରିଛି |ଆପଣ ନାହିଁ କଲେ,ମୁଁ ଅନ୍ୟ ଆଡେ ଦେଖିବି |ଭାରତୀଙ୍କ କଥା ଶୁଣି ଅନସୂୟାଙ୍କୁ ଲାଗିଲା,ସତେକି ତାଙ୍କ ହାତରେ ସରଗ ଚାନ୍ଦ ଖସି ପଡିଛି !!ସେ ଉଲ୍ଲସିତ ହୋଇ କହିଲେ,ମୁଁ ତ ଆନିକୁ ବୋହୂ କରି ନେବାପାଇଁ,ଚାତକ ପରି ଚାହିଁ ବସିଛି |ଆପଣ ଆଜି କହିଲେ ଆଜି ମୁଁ ତାକୁ ବିନା ଜାତକ, ଯୌତୁକରେ ବୋହୂ କରି ଘରକୁ ନେଇଯିବି |ମୋ ପାଇଁ ସେ ସାକ୍ଷାତ ଲକ୍ଷ୍ମୀ ପ୍ରତିମା |
ଭାରତୀ କହିଲେ,ମୁଁ ମୋ କଥା ଶେଷ କରିନି,ଆପଣ ଏତେ କଥା କହି ସାରିଲେଣି |ଆକଚୁଆଲି ବାହାଘର ପାଇଁ,ମୋର ଗୋଟିଏ ସର୍ତ୍ତ ଅଛି |ତାଙ୍କ କଥା ଶୁଣି ଅନସୂୟାଙ୍କ ତଣ୍ଟି ଶୁଖିଗଲା |ସେ କହିଲେ,ସରି |ମୁଁ ଆପଣଙ୍କ କଥା ଶୁଣି ଏତେ ଖୁସି ହୋଇଗଲି ଯେ,ମୋ ମନରେ ଯାହା ଥିଲା,ସବୁ କହି ପକେଇଲି |ଏଥରକ ଆପଣଙ୍କ ସର୍ତ୍ତ କଣ କୁହନ୍ତୁ |ଭାରତୀ କହିଲେ,ପ୍ରଥମେ ଦୁଇଜଣଙ୍କ ଜାତକ ମେଳକ ହେବ,ଯଦି ରାଜଯୋଟକ ପଡିବ,ତାହେଲେ ବାହାଘର ହେବ |ଅନସୂୟା କହିଲେ,ଜାତକ ମିଶେଇବା ତ ପୁଅଘରର କାମ ,ସେ ଦାୟିତ୍ତ୍ୱ ମୋ ଉପରେ ଛାଡି ଦିଅନ୍ତୁ |ଆପଣ କାହିଁକି ବୃଥା ଟେନ୍ସନ ନେବେ ?
ଭାରତୀ କହିଲେ,ନାଁ ସେମିତି ହେବନି,ମୁଁ ନିଜେ ସାଟିସଫାଇ ନହେଲେ ବାହାଘର ହୋଇ ପାରିବନି |ଆପଣ ପୁଅର ଜନ୍ମ ତାରିଖ,ସମୟ ଓ ସ୍ଥାନ ହ୍ୱାଟସଅପରେ ପଠେଇ ଦିଅନ୍ତୁ,ଏଇଠି ମୋର ଜଣାଶୁଣା ଜଣେ ଭଲ ଜ୍ୟୋତିଷ ଅଛନ୍ତି,ମୁଁ ତାଙ୍କ ପାଖରେ ଜାତକ ମିଶେଇବି |ଅନସୂୟା ହଉ କହି,ଭାରାକ୍ରାନ୍ତ ମନରେ ଫୋନ ରଖିଦେଲେ |(କ୍ରମଶଃ)
No comments:
Post a Comment